迷你奶皇月餅

今年係我第一次做傳統月餅。

咁多年都無整過傳統月餅係因為我本身唔太鍾意食蓮蓉，以前喺香港食月餅，會揀舊最多蛋黃嘅。不過講真，就算我鍾意食蓮蓉，都唔知係依度點樣整蓮蓉。上年返 香港，買咗一個迷你奶皇月餅回來同呢度嘅香港朋友分享，一個迷你奶黃月餅上年賣港幣二十七，雖然好味，但係我覺得好貴。計落其實我可以自己整倒，所以今年 返香港嘅時候就買咗月餅模！

月餅模喺上海街買，好多鋪頭都賣大約二十蚊一個，不過比我見到有一間有套裝，可以有六個唔同花紋，仲要有車輋最鍾意嘅叮噹，老闆話成條街得佢地呢間有，五十八蚊成交，好開心！

上網搵食譜，好多人嘅做法都係跟半島酒店葉師傅的。雖然我冇食過半島酒店嘅奶黃月餅，不過亦聽聞過。而我今次就係跟米桶嘅做法，她說配方基礎亦是來自葉師傅，再加上自己細部調整。
呢個星期車輋有sports day camp, 我可以專心係廚房玩。
我分咗三日去整，第一日預備奶皇餡 (16個迷你月餅份量）：
- 糖 60g
- 低筋麵粉 18g
- 吉士粉 18g
- 奶粉 18g
- 芝士粉 10g
- 煉奶 25g
- 椰漿 100g
- 溶牛油 30g
- 鹽少許 (或用有鹽牛油）
所有材料混合後蒸大約十五至二十分鐘至熟，蒸的過程，要用膠刮攪拌幾次。完成後，搓至柔軟，加入四隻蒸／焗熟的鹹蛋黃粒。

我嘅鹹蛋黃係媽咪教我直接放鹽係蛋黄上面生醃的，需時大約一星期。雖然冇真正嘅鴨旦咁香，不過就係快和簡單，還可以吧。

混合好後，用焗爐紙包好，再入密實袋，然後冰格雪藏一晚，第一日收工！

第二日預備月餅皮：
- 糖粉 60g
- 牛油 120g
- 鹽少許 (或用有鹽牛油代替）
- 蛋黃 25g
- 椰漿 25g
- 低筋麵粉 265g
做法和做曲奇一樣，先將室溫牛油和糖混合再加入其他液體，最後加入麵粉。今次量量下材料，個電子磅突然無電！好在掉轉兩粒電之後仲可以量埋最後兩樣。材料混合後要在冰箱雪一小時，呢個時候我就去了超級市場買電（因為是那隻圓形的2032電，家中沒有存貨）。

將月餅餡平均分為16份，每份20g;月餅皮每份30g。

包好後放回冰箱雪一會兒，印模前掃上少許高筋麵粉，模具亦同樣掃粉。

見到第一個月餅印出來時心情 真的很興奮！雖然不是每一個也完美，但我對這個第一次已經感到滿意。印好後須要放回雪櫃冰箱雪最少一小時才可以焗，我就雪過夜，第二日收工。

  焗爐預熱250c, 月餅掃上一層很薄的蛋液（蛋黃一隻加一小匙蛋白），焗五分鐘後取出，掃第二層蛋液，靜待十分鐘，掃第三次蛋液，入爐焗四分鐘，掃一層糖水(1:1), 最後多焗一分鐘完成。傳統紋焗起清楚過公仔模樣, 下次做冰皮，便不會出現走樣情況。（真實我係想做雪米滋）

食譜話室溫下可以放三日，放雪櫃可以放三個星期，食之前可160c焗五分鐘，放涼後一樣鬆脆，同樣好味。

星期六約了香港朋友慶祝中秋，祝大家中秋節快樂！