2015暑假遊記之「達文西最後晚餐壁畫」加「米蘭大盜」

同「11」一家人嘅36天意大利遊圓滿結束！同佢地一齊好開心，多謝佢哋今年有十份一時間喺意大利陪伴我，八月十八日玩完最後一日主題樂園之後，他們一家 人乘專車由酒店往機場，我們一家向天空之城進發，留多一日便回家了。玩左咁多日，分開嘅時候真係唔捨得，雖然好快又見面，不過我都忍唔住喊😭，車輋大情大性，易喊易笑嘅性格，應該係遺傳自我呢個喊包。
今日又去咗水上樂園，咁我又可以Hea下update下blog。

之前喺佛來倫斯已經hea住寫咗一篇美食分享，所以今次遊記唔順序，諗到乜就寫乜。
今年行程:
15-19/7 威尼斯
19/7-2/8 返我哋Brescia 屋企hea😂當中包括去Verona 動物園，米蘭快遊，outlet shopping ,自家私房美食，烹任班，幫手收割，花園泳池嬉水，打羽毛球，打籃球，仲有小朋友嘅做功課同埋練樂器時間😆😂！
3-8/8 佛羅倫斯
9-16/8 羅馬市中心，zoo marine
17-18/8 Magic rainbowland (離羅馬市中心45分鐘火車）

11一家對上一次到訪意大利係六年前(2009暑假）當時啲小朋友比較細，我哋淨係留喺意大利北部玩。由於六年前他們已經去過米蘭，上過大教堂頂，所以今年重遊米蘭，主要係去睇達文西位於聖母瑪利亞感恩教堂嘅最後晚餐壁畫。
想睇呢幅名畫，係要兩個月之前網上預約，有限人數，每節15分鐘。當日都見到好多人想即時walk in, 失望而回。 預約咗嘅都要預早少少去換票報到，有十五分鐘欣賞時間，不能拍照。
由於我本身不太懂欣賞美術，對博物館名畫等亦沒有太大興趣，所以呢篇遊記重點不在介紹名畫，大家如果有興趣去，上網不難找到資料，最重要係預早book。 名畫其實正確係位於敎堂旁邊另有入口，不是在教堂內的。我們睇完畫之後，想順便參觀埋教堂，不過教堂有休息時間，我哋都等咗一陣，大約下午三點先開門(不 太記得了），所以如果想參觀名畫加教堂，可以先留意一下開放時間。

參觀過後，11同11嫂去了另一美術館，而我就同小朋友去大教堂附近食下雪糕，行下disneystore。之後會合，來個快shopping加晚餐便撘火車返Brescia。
米蘭火車去Brescia 快車45分鐘。由於天氣熱，為免普通車可能冇冷氣加可能冇位，亦經常delay, 我哋選擇了快車，反正十四歲以下小朋友坐快車是免費的 (慢車4-12歳半票）。
我一早已經網上買了火車票，每張票亦有畫位的。當我哋去到坐位預備坐嘅時候........有兩個女子話我哋坐咗佢個位，但係佢哋只是指手畫腳，俾人覺得 佢哋唔明意大利文又唔識英文咁。我同佢哋理論，叫佢俾張車票我睇，佢哋又拎唔出，呢個時候車長經過，大叫佢哋係偷嘢的，趕佢哋落車! 下一秒，我發現我本來放喺袋(膊頭孭）嘅銀包神奇地出現在坐位上😱😱😱！！好驚險呀! 即係其實佢哋已經到手，只是車長及時來到，佢哋放棄速逃，免得人贓並獲！真係嚇死我，再一次感謝天父保守!

成日有人問去意大利旅行係咪好危險，我都會答香港女人街一樣危險，不過經過呢次埋身經歷，之後嘅旅程都格外小心。這是我在意大利十二年第一次埋身遇大盜，所以其實話十分危險又不至於，總之大家小心財物，尤其在交通工具上，便不用過份擔心。