咖哩角、豬肉鬆

上星期，本來承認咗車輋再要炸多D蝦片嘅，咁炸得我就當然唔止炸一樣嘢，所以計劃整咖哩角。星期四買好食材，預備好餡料打算星期五整，點知....嗰晚車輋開始咳😰😷....所以我話唔可以炸嘢，但係因為已經預備好個餡，所以我就先包好，再放入冰箱forzen。

包咖喱角嘅同時，我就煲咗蘋果豬𦟌海底椰湯俾佢潤返下。煲完湯嗰舊豬肉，我將佢變身成豬肉鬆。

呢兩樣都係第一次整，所以簡單紀錄一下做法。煮咗十幾年都仲可以有第一次，廚房真係學海無涯。
咖哩角三十四件：
100g 免治肉(我用豬牛mix)
100g 熟薯蓉
100g 洋蔥
先炒軟洋蔥，加約0.8tsp咖哩粉，黃薑粉少許，再加肉碎炒熟之後加薯蓉，再加50 ml椰漿，0.4 tsp糖鹽, 0.8tsp生抽調味(1:1:2)
正方形春卷皮一開三，變成三條長方形就可以包成三角形。

豬肉鬆更加容易，手撕開㷛完湯嘅豬肉，加自己喜歡的調味慢火炒乾。我今次就落魚露，生抽，咖哩粉，胡椒粉，糖鹽。炒完嘅豬肉鬆仲有脆口嘅感覺。