腸粉

我伯伯(車輋的伯爺）每日都一早起身，七點出門去囍雲天飲早茶的。

暑假回香港的時候，我同車輋都有好幾次一早起身同伯爺飲茶。除了是因為我為食，鍾意食點心外，更加想多些陪伴老人家。車輋亦好乖冇懶床。


有次伯爺打電話來，車輋接電話
伯：聽朝飲唔飲茶呀？
車：不過我哋請
伯：到時先算啦
車：如果我哋請就去，唔係就唔去
伯：咁好啦

車輋唔鍾意試新嘢，飲茶最愛布拉腸粉，奶皇包，馬拉糕。所以次次都會叫碟腸粉俾佢。

今日趁 marco唔返黎食晏，我心血來潮想食腸粉，於是即刻浸粉。
150g 粘米粉
450g 水
澄麵粉 1 tbsp
粟粉 1 tbsp
油 1 tbsp
鹽 1/4 tsp

蒸腸粉好花時間，最慘係唔係全部成功。開頭第一塊好完美，之後開始難控制。後來俾我諗通咗，唔知係唔係因為個碟入咗倒汗水所以影響成品，於是我每蒸完一塊，用紙抺乾碟再掃油，由頭嚟過，終於正常返好多。

車輋放lunch回來好開心;
我：好唔好食呀？
車：好好食呀！
我：似唔似茶樓嗰啲呀？
車：似呀！呀，唔係，係一樣先啱！

最後車輋食晒全部腸粉，而我就食咗碟失敗嘅碎😅冇所謂啦，最緊要有人捧場。

麻醬：花生醬加蜜糖加暖水
白芝麻：預先白鑊炒香
甜豉油：萬字醬油加糖叮/煮溶
甜醬：海鮮醬(呢個車輋唔落)