蔥油餅、椰汁西米露

車輋已經放咗三個星期暑假，功課都已經做得八八九九，今個星期佢一連五天去sports day camp，朝九晚五，唔洗理佢食午餐，我只需要(間中）負責揸車接佢，都算有得hea 下。
為咗一齊玩，暑假期間我都有同佢一齊親子煮嘢食，早排就一齊整左蔥油餅。

 

耐唔耐我見到人哋D蔥油餅食譜我就會忍唔住想整嚟食，加上呢度買蔥一買就好多，啱晒整蔥油餅。有時真係多到用唔晒嘅，我會整定的薑蔥油。

蔥油餅做法：
100g中筋麵粉 （我用嘅係蛋白質含量10%）混合75g滾水，少許鹽(我就加左lardo肥肉片，所以可以唔落鹽），靜待30分鐘。
分開幾份壓平，加蔥粒，捲埋，再壓平。平底鑊煎至兩邊金黃香脆。
 
當日得我同車輋兩個食午餐，我哋仲整咗個椰汁西米露加幾粒湯圓。第二日仲加左西瓜食，西瓜西米撈！

我整嘅椰汁西米露非常簡單，懶人版本。
18cm煲約放3cm高水，加適量冰糖煮溶。同一時間浸50g西米。水滾後加入西米，到水再滾熄火，加蓋，焗至透明，然後加入一罐400毫升嘅椰奶，煮熱便成。