端午節鹹肉糭

對上一次包糭係2007年，當時係大住個肚，包唔掂，最後係marco出馬幫我包，當年嘅blog仲喺度: http://blog.yam.com/heartsoup/article/10589011
我鍾意食糭，但係其實香港一年到晩隨時都可以買到，所以包過(玩過）第一次之後一直都冇諗住再包。不過早排我係中國超市見到竹葉，加上今年暑假唔會返香港，所以又有D心痕。不過我有先見之明，我知我會搞唔掂，所以已經問定Marco可唔可以幫我包😊 平時飛機機艙行李都係marco幫我扎，而喺香港回程就係22出馬😘。

我就趁星期一朝頭早marco唔使返工約咗佢包糭。我前一日先浸定糯米，綠豆，竹葉浸軟再㷛滾焗。腩肉就早三日用五香粉鹽醃，咸蛋黃就更加早之前醃落。包 糉嗰朝就倒咗浸米同豆嘅水，加油鹽糖醃味。我今次用了400g綠豆（鹽兩茶匙，糖一茶匙，油一茶匙），660g糯米（鹽一湯匙，油一湯匙，糖一點五茶 匙）。

開工當日，由於車輋已經放暑假，我哋係一家親子包糭。我負責攞啲竹葉出來抹乾淨，車輋負責切去頭尾，之後就全部Marco負責包👍🏻。

由於我預計包十隻糉，所以預備左四十塊竹葉，不過由於有D葉爛咗，所以最後只係包到九隻。下次再有機會包糉，一定要預多D竹葉，反正一包裏面其實有好多塊，而家剩返嗰啲如果唔包糭，唔知仲有乜嘢用途呢？
用剩左嘅材料，我全部放左落電飯煲度，加埋一塊葉去㷛，原來都好OK。所以包糭當日，我就只係食咗電飯煲糭，烚好嘅糭(我烚左兩個幾鐘頭）趁熱拎出嚟吹乾，放涼後入冰櫃急凍，隨時可以有得食。我上網見到話要趁熱拎出嚟風乾，如果一直浸住凍左啲葉會難乾，咁就容易變壞。
一陣午餐我會烚一隻食嚟應下節😊
包糉方法係跟christine簡易食譜嘅video: http://www.christinesrecipes.com/…/how-to-wrap-sticky-rice-…