臘膶腸冬菇滑雞㷛仔飯

除咗零食之外，今次亦都買咗好多臘腸膶腸。其實我記得我細個嘅時候係唔鍾意食膶腸，不過因為咁多年冇食，又有啲懷念，所以今次特登買啲膶腸返嚟。可能因為就快農曆新年嘅關係，周圍都見到臘腸膶腸賣，好有新年氣氛。


我好搞笑，喺吉之島見到有美心臘膶腸，我最鍾意就係佢嘅兩條獨立包裝，好方便，所以見特價就即刻買。當時心諗，臘膶腸又幾好喎，一包有晒臘腸同膶腸，返到意大利unpack行李嘅時候, 睇真啲覺得兩條係一樣顏色，全部都係膶腸😆我仲以為有雙拼，真係諗多咗😂😂😂。

不過都好嘅，因為我另外已經有16條臘腸。本來冇諗住買咁多，不過係工展會見到有鴻星黑松露臘腸同黑蒜臘腸又忍唔住試吓。

18cm LC 㷛仔飯：
1.5cup米加1.5cup水先浸半小時。
煮滾後用筷子攪拌米，然後加臘腸，膶腸冬菇 (冬菇我懶另外燜，只用蠔油，糖，油撈好），30秒後轉細火煲十分鐘，然後加雞再㷛15分鐘便可以熄火焗10分鐘。如果要有飯焦，食之前再大火加熱。(參考鬼嫁料理手帳）
最後我喺飯面加上煲仔飯豉油和大蔥，多焗幾分鐘便可以開動。
好好味呀，好味到本來我煎咗荷包蛋諗住放上面，最後食完一碗飯先見到唔記得咗加😂😋。