新玩具測試x2

今個暑假喺香港帶返黎嘅兩件新玩具，啱啱完成了測試，效果滿意。

Marco Boston 出trip, 買咗D蕉食唔切，所以有一朝整咗香蕉pancake做早餐。一路同媽咪傾電話一路整，媽咪問我係咪用My melody pan，佢唔提我都差啲唔記得咗😅。其實依個pan喺香港嘅時候已經叫媽咪整咗一次pan cake，不過我用自己食譜，自己整就係第一次。

我懶分開兩次煎，一次過倒晒啲粉漿落去，啱啱好整左一個厚嘅香蕉pancake。個melody樣好出，成功！

Marco出trip，車輋同我瞓。叫佢起身食pan cake ，佢話要喺床食😅。冇問題，holidays! 咁我問佢你飲奶定飲朱古力奶，奄尖大少話要飲奶茶！好，奶茶就奶茶（Lipton 有種冇茶因嘅茶包）。搞掂拎俾佢嘅時候，佢特登切到淨返melody個樣留俾我食，算佢有我心啦😊。

香蕉pancake食譜：
1）一隻熟蕉加一隻蛋混合，加2.5tbsp自發粉，1tbsp糖，少許奶，1tsp油 (如果做原味，唔用香蕉，我會加2.5tbsp乳酪代替)
2）煎pan不用加油，熱pan之後落粉漿，收細火，唔好心急翻轉，要等到表面好似月球表面有好多氣泡同埋肯定個底已經轉左色，先可以小心反轉。

 遊閒星期日，唔好咁懶，拎部雞蛋仔機出嚟試下。

食譜我用返自己用開嘅(亦即係I love cake 嘅食譜，不過我自己減左糖）。其實買部機返嚟嘅時候我都冇認真研究，原來部機係可以反轉嘅。

即係將啲蛋漿倒左落去之後，成部機180度反轉，再等大約4分鐘就完成，稍為吹凍就可以食。確係好方便，又脆又乾淨。

雞蛋仔食譜：
1）篩70g麵粉(我試過低筋同中筋麵粉分別都唔大），7g吉士粉，4g發粉，14g木薯粉
2）蛋一隻加50g糖混合，加70g水，1tbsp 奶
3）將(2)慢慢加入(1), 搞至冇粉粒，加1tbsp油，放雪櫃待用(原食譜話雪30分鐘以上，不過我好多時都雪唔夠都冇問題）
4）雞蛋仔摸我掃咗少少牛油，插電，到夠熱嘅時候就可以落粉漿，合上蓋，翻轉，大約4分鐘便可取出放涼，完成。