燒腩肉

剛過去的週末，去了好友家打邊爐兼過夜，五個香港女人傾到零晨四點先去瞓！好在當晚轉冬令時間，4點變返三點。真係好耐冇試過，好似去返讀書年代，突然青春咗！

 　

我預備咗幾樣食物帶去分享，其中一樣係燒腩肉，今次集各家之大成，好成功！
車輋都食咗兩片脆脆燒肉皮。

因為冇成舊豬腩肉賣，今次都喺買腩片。
先將豬腩肉快拖水，索乾水份或放入雪櫃過夜。喺豬皮上狂插！因為肉片皮已切開，所以我用bbq串燒棒嚟拮皮，再將三塊肉𢶣埋變返一舊，用酒(我冇紹酒，所以用咗sakè),五香粉和鹽搽在肉的外邊。

用錫紙將肉包實，再皮上面放幼鹽，不用cover,放入雪櫃一晚風乾。
入焗爐之前將鹽用餐刀刮走，再用廚房紙抹乾淨。

大概二百度焗至皮脆肉熟，稍為放涼後切件。