大功告成

應承咗Marco幫佢公司整Macarons，因為要整好多，不買不買仍需買，買咗張新Macarons Mat。我之前已經有一張mat，不過因為同一mat有兩個sizes，所以每次只可以做到七個(14個單邊)。新呢張可以做到24個(48個單邊)，快三倍有多。

開頭Marco話整50個，當時我已經知道50個得好少，心目中打算整100個。我做咗50個後，佢都覺得好少，便叫我整得幾多得幾多！！

最後，我用咗三日，一日開大約三爐，整咗大約200個。當中扣除整得冇咁好嗰D，試食咗嗰D，最後pack咗168個俾佢帶回公司。

其實佢幾個月前已經問過我可唔可以幫公司整macarons，不過當時我冇色粉，用液體色素整極都整唔到佢要的橙色，我人都癲！冇咁大個頭唔好戴咁大頂帽，所以當時我提議不如幫佢整cookies同strawberries dip chocolate。

後來我網上學咗D整macarons的成功秘訣，再加上買到色粉，所以呢個任務終於能夠完成！

今次都試咗個新dark chocolate ganache filling。基本比例係100g 淡忌廉，100g dark chocolate，10g 牛油。
先煮熱淡忌廉，有煙，不過唔好起泡。離火，加朱古力，等一分鐘先開始混合，再加牛油，全部混合好便放雪櫃雪幾個小時以上備用。



32個Marcarons做法是:
1)60g杏仁粉和100g糖霜用機打至粉上加粉，然後再過篩(呢個程序係為了將粉狀變得更幼細，防表面有裂痕)

2)70g 蛋白和40g糖打起，臨尾加入色粉一起打

3)先將大約三份一打起蛋白混合杏仁糖粉，然後再混合餘下的

步驟好似簡單，不過有好多細微嘢要注意。好似要用膠刮攪，攪到點先為之ok?好多嘢都會影響成品。我喺網上睇過有個食譜教攪到數十下個糊自動平返便可以做下一個步驟。

要做到裙邊，焗之前表面一定要唔黏手, 我會開焗爐大約50度，連吹風，打開個焗爐門，放下層等佢吹幾分鐘，好快就唔黏手。然後再關門，用130度焗大約15分鐘.