Pancake畫

前幾日係Facebook睇左個畫pancake嘅video，我諗好多人都有睇到，好似唔係好難所以今日下午茶就試吓。


我預備左兩個bump, 一個用來畫，一個粗啲嘅用嚟填色，不過其實淨係用一個都OK。
煎pan不用加油，先畫咗個型，面頭有bubble就好似油顔色咁填滿。到後加的粉漿都有bubble時就可以反面了。

我特登畫好左一個多啦A夢先去接車輋放學。我同佢講一陣你返到屋企要瞇埋眼我俾個驚喜你。
車：我知，圓型果啲呀嘛
我：唔係喎，今日唔係整卷蛋
車：唔係我意思係pancake
我：你咁叻嘅？不過你唔知乜嘢圖案
車：多啦A夢吖嗎！
我：你又知！無晒驚喜啦
車：你頭先食晏嗰時咪講咗囉，不過我都一樣要瞇埋眼咁樣開心啲！

次次我諗住俾D驚喜人嘅時候我都好興奮，成日都忍唔住講咗出嚟無晒驚喜😅好在車輋見到嘅時候都嘩咗一聲。

 
 之後我再畫多咗一個加菲貓，其實除咗加菲貓同多拉A夢我都冇嘢識得畫，就係美術零天份的。於是浄咗嘅粉漿我叫車輋畫埋佢，佢畫咗我同埋佢自己。佢今朝甩咗一隻上門牙，之前連續四隻都係下排，今次第五隻。

因為掛住打呢個post，最後一個唔記得收慢火，深色咗D。


 

 車：咁我咪係燶人哆
我：當你曬黑左啫，我食哆。
車：我食，不多搽花生醬！

我呢個pancake口感好似麥記熱香餅:
2.5 tbsp 自發粉
2.5 tbsp 純乳酪
1 tbsp 糖
蛋一隻
少少奶 (約2-3 tbsp)
少少油 (約 1 tbsp)