煎蘿蔔餅

今朝好勤力，三個半小時喺廚房度整左七八樣嘢：蘿蔔糕、煎蘿蔔餅、預備好晚餐漢堡扒(加用來同肉一齊食的芫茜醬）、唔知幾時食不過整定嘅黑木耳榨菜蒸豬肉 (因為怕啲豬肉變壞，快啲整左佢先）、Marco同車輋牛肝菌意大利燴飯午餐（Risotto ai porcini), 每人一杯慢磨果汁，仲煲咗蘋果杞子水！一路整仲同媽咪傾左45分鐘電話，好productive的一個早上。

前幾日喺對面mini supermarket見到有靚白蘿蔔，忍唔住買咗一條，但係唔想整個大蘿蔔糕自己食晒，所以用咗一部份嚟整蘿蔔煎餅。

蘿蔔刨皮後磅重，用300g做蘿蔔糕，淨約260g用來煎蘿蔔餅。食譜參考jacky囍宴（http://xiyanjacky.blogspot.it/2012/01/blog-post_21.html?m=1），由於原食譜冇註明蘿蔔嘅重量，我今次260g蘿蔔，就用了300g上湯去煮，粉類就用了食譜嘅三分一，即係166g糯米粉，66g粘米粉。

蘿蔔煮熟後放涼，加入餡料，我用了冬菇蝦米臘腸及大量的芫茜，胡椒粉鹽調味，混合好後煎至金黃香脆。

我今日呢個份量煎到十五塊，如果將來再做我會減少糯米粉份量，可以更加脆口。