猴年大年初三: 蒸糕day ......加......結婚十三週年

為咗初七團拜，昨天再整了二百多粒笑口棗，今日就用咗全日時間一日過整好年糕，馬蹄糕和蘿蔔糕。祝願大家全年笑口常開，goal goal goal💪🏻💪🏻💪🏻 (高高高....三高就唔係咁好....不過都可以代表高興，高分，快高長大！）🎉🎉🎉😁😁😁

 

我最期待係馬蹄糕，因為少食，記得上年唔夠馬蹄，所以整得好少。今年見到中超有罐頭清水馬蹄，買嚟試吓，有驚喜，我覺得比之前買到急凍的更好。

因為唔想留，我重手用哂成罐，用了300g馬蹄粉做了一個22cm㷛份量。開頭我係打算原㷛煮熟，不過因為怕唔知煮到幾時先至得，所以我煮到约七，八成熟時，放入糕盤蒸十五分鐘。
我的做法是:
1) 300g馬蹄粉加600g水
2)450g糖加600g水煮熔，我用了250g冰片糖加200黃糖，其實用其他糖都應該得，不過媽咪話馬蹄粉來身灰色，用片糖可以令到D色好D。
3)將20%馬蹄粉水和馬蹄碎加入糖水，煮至杰杰哋，熄火，加入其餘馬蹄粉水，混和好，蒸大約二十分鐘。媽咪話佢唔蒸，淨係不停慢火煮到透明，其間要不停攪。
如果用蒸的話，蒸之前要確保夠杰身，馬蹄才會分佈得平均。
由於我冇蒸爐，每次只可以蒸兩底，到全部完成已是晚上七點多。好在今晚出去食飯慶祝結婚十三週年紀念，唔洗煮飯😄。

週年晩餐又係去nineteen。我哋懶搵新餐廳，又必定滿意之選。 

返屋企仲同車輋一齊睇當年結婚嘅video! 我哋對上一次睇係十一年前，結婚兩週年，亦即是車輋是第一次睇。
Marco話見到anna bb (我姪女）當年咁細個，而家咁大個就覺得不經不覺地過咗好多年。重溫video令我百感交集，多謝當年每一個出席我哋婚禮的親朋戚友，能夠得到大家的愛錫，我覺得很幸福，愛你們❤！