班蘭蛋糕2.0版

早排整咗一次班蘭蛋糕(....係呀栗子蛋糕仲未還嘅時候又整第二次班蘭蛋糕），上次膽粗粗俾咗新加坡朋友試食，得到好多寶貴嘅意見，仲有一個新加坡blogger(http://kitchentigress.blogspot.it/?m=1)嘅食譜，真係大收穫！

前日去中國超級市場，買咗新鮮班蘭葉，於是我尋日好認真跟住食譜去做，煮嘢食真係學海無涯。

新食譜同我平時嘅做法最大唔同係用咗椰奶，焗嘅時候比我之前高溫同埋時間長，呢點正好解決到我之前個面太濕嘅問題。

今次冇用慢磨機去壓班蘭葉，跟食譜剪碎班蘭葉加椰漿，用神仙棒去打茸再壓汁。因為唔想開一罐椰漿跟住又唔知點處置，所以第一次試買椰粉開水變椰漿，都幾方便，用幾多開幾多👍🏻。
不過由於chiffon cake實在太易入口，整好未夠一日，已經食咗三份二，我仲有10個星期返香港，我諗我唔可以再整，如果唔係之前減嗰啲都前功盡廢😆。
7吋班蘭蛋糕：
-蛋黃60g mix with 25g 黃糖，50g 粟米油，加班蘭椰汁65g (用大約100g班蘭葉＋75g椰漿打茸壓汁，不過我壓完之後唔夠65g所以我再加左牛奶同埋少少椰子香油），80g 低筋麵粉，1/8 tsp發粉，1/4 tsp 鹽
-蛋白150g 加60g 黃糖打起，然之後分三次伴入粉漿
180度先焗20分鐘，喺上層蓋上焗盤，再焗多20分鐘，倒扣至完全冷卻才脫模。