漢堡扒

平日買免治馬肉多數都係tartar生吃，不過呢次Marco話用嚟做burger。
印象中我未試過做漢堡扒，所以當然要上網搵下食譜。見好多人都係參考masa的食譜，一於試下。

呢個食譜好易記： 4：1：1：1
就係400g 肉（可以係牛豬再7：3），100g 洋蔥（先炒熟），100g 麵包糠加奶（30g麵包糠先吸收70g奶，一定要兩者先混合好再加入其他材料，否則直接落奶會太濕），蛋一隻。
自行加salt&pepper。

唧花曲奇

做得印模曲奇多，想轉下口味。上網搵到啲牛油曲奇食譜，係就係好鬆脆，不過我焗完太鬆散，係屋企食，一啖過都可以，不過要帶返學校做茶點一定碎晒。

好在記起我有一個多年前嘅曲奇食譜，可以自己唧花，又可以用曲奇槍。
第一盤我自己手唧，第二盤就車輋用曲奇槍，當焗緊第二盤嘅時候，我哋兩個差不多將第一盤食晒！焗完之後仲誇張到即刻出街買材料再整，因為我地知道應該留唔到星期一返學已經冇晒！

呢個就係我買咗好多年既曲奇槍

慶中秋

有好多篇blog想寫未寫，先快去返上星期嘅中秋gathering先。
上年中秋，我哋女人一枱，老公一枱，細路一枱，今年我哋直頭冇預班男人，佢哋帶埋D細路出街食，我哋勁free!

中秋節快樂

今朝收到朋友whatsapp，借來祝大家中秋節快樂！
今年會星期六先做節，到時再同大家報道。

茶點曲奇

車輋返咗小學後，要自己帶茶點，今晚應承整曲奇俾佢，問佢要乜嘢味，佢竟然話要四種味：芝士，朱古力，綠茶，原味！本來我都好想滿足佢，不過我揾唔到包綠茶粉，希望唔係掉咗！喺香港時我買咗都冇拎返嚟添，明天再努力搵下，今晚先焗朱古力和原味。

今年返香港時，有親戚（亞嫂個妹，唔知點叫，不過都算親戚啩）送咗叮噹叮嚀，大牙大鼻曲奇模俾我，印得好清楚！車輋日日都要睇多啦A夢，啱哂佢！

材料： （約二十四塊）

牛油 100g

糖 65-80g 

蛋黃 1隻

麵粉 200g 

先將牛油和糖混合，加蛋黄，再加麵粉，如做其他味，再另加芝士粉，朱古力粉等味。

所有材料混合後是鬆鬆散散的，可以放入保鮮袋比較易壓實。然後放入雪櫃。如果唔係即日焗可以雪藏冰格，幾時想食都得，又可以隨時用來做撻皮。如果即日焗，最好都放雪櫃下格最少一小時。

雪櫃一拎出嚟係有D硬和碎，不過搓下碌下好快就成到一塊可以印模。

呢個食譜我用咗好多年，下次想試嘖花曲奇。

烏龍媽咪整餅記

話說車輋第一日返小學，我就想做佢最鍾意的戚風蛋糕俾佢做早餐，同佢打打氣！

返學前一日，成個下午都忙於為車輋新文具貼名，加上堂細路過咗嚟玩，所以到晚飯前先有機會做蛋糕。

我先準備了漢堡扒(遲D再開一篇寫呢個新菜色)，然後開始整餅。因為戚風蛋糕我已經做個好多次，又不是太多step，所以我想不會用太多時間。

一路做蛋糕，車輋一路話好肚餓，個肚乜都冇喇！我就話好快，放咗入爐我就會煮俾佢食。

小學一年A班

車輋小學有三班一年級，每班22人，開頭九日(連星期六)返0830-1230, 之後23號開始返全日，不過車輋可以返屋企食午飯，所以返學時間係星期一至五，0830-1230 然後 1400-1600。由於小學可以選擇喺學校食定返屋企食午餐，我哋住得咁近，加上車輋三年幼稚園都只係食主菜一的飯麵，從來都唔會食主菜二的肉(是的，幼稚園的餐單已經有兩個course),每日俾成七歐元淨係食pasta，返屋企好過啦！一年飯錢已經等於我同車輋返香港來回機票！(大家唔洗擔心，佢喺屋企有食肉的)

講返車輋第一日返小學，佢之前已經講咗好多次驚，不過前兩日開家長meeting我哋帶埋佢去，咁佢已經見過老師們，又去過課室，個心應該定D。今朝等開門時見返D幼稚園同學，又開心多D啦。

小一開學預備篇

話咁快過咗三年冇功課，日日玩的幼稚園生活，今日2013年9 月12日，車輋六歲三個星期又一日大，係小學一年級生了！

好在我哋住喺學校對面，如果唔係連幾時開學，幾時要開家長會都唔知！因為學校淨係喺門口貼通知，好多家長都唔知前日(10號)小一家長有meeting。

相識十二年

十二年！時間過得真係好快，我哋已經一齊經過了十二個不同生肖。
十二年前蛇年，我還是廿三將快廿四，十二年後.......年䶖就唔洗提，感激身邊仍是那個他，還要感恩多了一個我和他的他。我們今晚更想到再過十二年，車輋都有車牌了！



今晚我們去了nineteen19, 這間餐廳我們相識十年時第一次光顧（多得有寫blog記低），這裡由頭盤到甜品都從來沒叫我們失望。

每次去都不一樣的餐前小食

米奇沙律

呢個米奇大碗係呢次香港收穫之一，喺disneyland 買，我買咗兩隻紅色大，一隻黑色細。多謝堂妹張全年通行証買嘢有discount。其實每年返香港買嘢，每當猶豫買定唔買時，我心中魔鬼都會自動將價錢變成歐元，再同自己講，唔係好貴啫！

不過無可否認，香港D嘢真係貴咗好多，由其係超巿嘅零食，不過我都買咗好多！pack行李時我都問自己係咪真係咁為食，成個hand carry都係食！

米蘭＂滿記＂

上星期六，同車輋去咗米蘭一轉，Gigi 帶咗我哋去唐人街"浦＂！嘩，個唐人街比起我八年前去唔同咗好多，有行人專用區，仲有小形商場，商場內仲有好似滿記style嘅甜品店！！我哋覺得好似去咗深圳！其實由我哋住嘅Brescia 去米蘭約1小時多D，真係同官塘去上水差唔多！

厚切多士

今年返香港，買了個多士模，從此就可以自製厚多士了！

新Blog新開始！

我第一個blog係10年前開嘅xanga blog, 而家都好間唔中會update。
之後2005年開始喺yam blog寫煮飯blog, 2007/8年搬去yahoo blog。

由於yahoo blog將摺埋，被迫搬遷。開頭打算在Facebook page延續下去，不過始終唔係太自在，有少少覺得成日喺人哋個news feed 出現，好似煩倒人，迫人睇咁。研究過blogspot可以由電話直接揀相上blog，唔洗開電腦先可以寫blog，加上有其他yahoo blogger都話轉blogspot,咁我都跟大隊，方便聯絡。

不過由於部份舊post我已經copy咗去Facebook page, 咁呢度就唔再重複，一於重新開始！雖然九月一號開學已經唔關我事好耐，不過都特登今日開新blog, 感覺完美D。

我會繼續同大家分享我喺廚房嘅所作所為，希望同blog老友keep in touch，亦歡迎所有新朋友一齊分享，多謝支持！