蒸腸粉

心血來潮整腸粉！整腸粉真係需要好多耐性，所以最好嘅方法就係同一時間做其他嘢，咁就唔會對住個鑊得個等字😆😆😂。好似我咁，今朝一路整腸粉嘅同時，亦都整咗香蕉蛋糕，寫咗一篇blog, 打咗好多candy crush, 幾捉咗幾隻小精靈😅😅😅。





雖然唔係第一次整腸粉，不過今次又有啲新發現值得記低。平時蒸完一塊腸粉之後，有時感覺仲係比較黏，好似好難捲起咁，今日整嘅時候我突然之間諗起蘿蔔糕(因為大家都係用嗰啲粉），蘿蔔糕凍左之後好容易倒出嚟，咁其實腸粉只要唔好心急，攤凍少少就會好容易捲。

我整左成兩個幾鐘先得果十幾條，不過見到車輋食得咁開心，間唔中都可以俾個驚喜佢。佢放lunch返嚟嘅時候仲幫手捲左最後一條。



腸粉約十二條：
150g粘米粉
1 tbsp粟粉
1 tbsp 澄粉
450g 水
1 tbsp 油
少許鹽
所有材料完全混合之後，平碟掃油，放入少量粉漿，中大火蒸。有啲食譜混合材料之後話要等幾小時，不過我試過唔等都冇分別。