自製麵筋甜酸齋

睇返自己啲食譜，原來對上一次整麵筋已經係2015年1月（http://heartsoupkitchen.blogspot.it/…/2015-115-18camp-marco…）。當時寫低咗「不過冬天洗咁多次隻手真係好凍，整麵筋都係夏天適合D。」趁住依家天氣未咁凍，又嚟玩下。

做法其實唔係好難不過需要一些等待時間。
1）首先將高筋麵粉(參考包裝蛋白質含量越高越好）1kg , 發粉2tsp, 少許鹽，600g水混合，加2 tsp油搓至光滑有彈性，開頭會有少少黏手，所以我用kitchen Machine幫手, 乾手淨腳。
2）麵團完成後，保鮮紙包好靜待一小時。


3）麵筋其實係麵粉中不溶於水嘅蛋白質，所以要將麵團放入水中洗去粉質。由於今次我有1kg 粉，所以我用左一個大洗菜盤去洗麵團。


4）洗完之後，放入雪櫃雪兩小時或以上。


5）取出切件，就可以準備熱油炸。麵筋好快發大成為一個波，好似街買嗰啲生筋，不過一拎出來就好快縮埋。

6）炸好的麵筋，煮之前要拖水去油。
雖然今次係第三次整，但仍然有嘢記低提醒自己：就係切件嘅時候，要一嚿嚿分開擺，如果擺得太近，或者重叠，佢哋係會黏番埋一齊，即係嘥氣😆。
我第一次整嘅時候我用廚房紙去印麵筋，啲廚紙黏住，要慢慢搣返出嚟😅所以其實煮嘢食，經驗好重要。
甜酸汁(約六十五舊生筋份量）
茄汁 12 tbsp
米醋 4 tbsp
糖 6 tbsp
喼汁 2 tbsp
水 8 tbsp
Marco喺美國公幹時買咗75% reduced sugar茄汁返嚟，我屋企又冇正常茄汁，我又懶得出去買，喺不太情願嘅情況下都係用咗低糖茄汁....過咗幾日車輋見到支茄汁，問我做乜冇咗咁多😅，好在買咗兩支