第一次自製麵筋：甜酸齋

今日車輋學校outing, 去參觀一個製造新鮮芝士嘅地方。我終於有機會整飯盒俾佢嘞！（平時佢係回家食飯，如果揀留喺學校食就要食學校提供的膳食，不設自行帶飯）

由於預計自己將會有七個半鐘free, 所以前一晚就不停諗有乜嘢大攪作!有好多野都想整，最後揀咗玩自製麵筋！

幾年前喺V女廚房個blog見到亞V整我覺得好驚訝，生筋都可以自製？拎個麵團去洗？好搞笑又好神奇。

不過我覺得又要洗，又要炸，又要煮，好似好複雜咁，所以一直都冇諗過要試。

上星期整咗咕嚕雞，同班好友whatsapp 傾開話咕嚕肉唔用豬肉用雞或者魚塊都得，我就話用麵筋都唔錯。不過我話麵筋製作過程複雜，可能有一日我好無聊好悶都會試吓嘅。咁檸檬羊就話大家唔好同我傾咁多計，咁我就可以去整麵筋！雖然係講笑，不過都再一次挑起我條＂筋＂！講多無謂，行動最實際，就趁今日＂day off",一於玩"洗麵筋＂。

1）首先高筋麵粉500g同300g水，baking powder 1 tsp, 少許鹽混合，加約1 tsp油搓至光滑有彈性。我就用左整麵包嘅高筋麵粉，蛋白質含量13%。蛋白質含量越高越好，因為麵筋其實係麵粉中不溶於水嘅蛋白質。

2）麵團完成後，保鮮紙包好靜待一小時。(趁呢一個鐘頭等候時間，我去左一轉超級市場）

3）將麵團放入水中，洗去粉質，搓洗至水不再有白色。我睇咗兩個食譜都係話洗大約五至六次，不過我就洗左十幾廿次！唔知係唔係因為我太心急，太快換一次水。

洗出來嘅白色水，沉澱後可以用來蒸粉皮，不過我就冇咁做。

4）洗完之後，放入雪櫃雪兩小時或以上。

5）之後切件，就可以準備熱油炸。由於我的出嚟嘅時候，見到個麵筋仲好濕，我好驚炸嘅時候好恐怖, 於是我做咗一件好低能嘅事：就係用廚紙印下個麵筋，結果......張紙痴住左，搞左好耐先搣返晒出來。

我對炸嘢好有陰影，因為十年前試過炸鹹水角，隻鹹水角連油帶角飛咗出來，差D毀容！好彩後來塊面冇事，不過手腕就有一個hk$5咁大嘅疤痕, 好彩帶錶都可以遮倒下，不過我同自己講我唔會再炸有糯米粉嘅嘢，太恐怖！

今次炸麵筋，我只係用左大約2cm高嘅油，一放左落去，我就離開幾尺擔張凳企高先睇。冇我想像中啲油彈得咁勁，都算安全。

麵筋好快發大變成一個波，好似街買嗰啲生筋，不過一拎出嚟好快就縮埋扁哂。

呢個份量我最後整到24個, 比我預期中少。我先用9個嚟煮甜酸齋，其餘15個forzen, 有食譜話可以keep半年。

炸好的麵筋，煮之前要先拖水（用滾水煮一下），出返D油。

甜酸汁：

茄汁 3tbsp

米醋 2 tsp

糖 1.5 tbsp

喼汁 1 tsp

水 2 tbsp

煮到收汁便成。放涼後更加入味，大成功！