士多啤梨蛋糕

車輋學校隔離，亦即是屋企斜對面去年暑假開咗一間mini supermarket, 主要係買蔬果，好多蔬果都好平，我都成日幫襯買橙同蘋果整果汁，緊急時去買下雞蛋同牛奶，來回都唔使十分鐘。前幾日去，見到大大盒士多啤梨2kg只賣 3.90€ 比起平日超市特價仲要平一半，唔買對唔住自己，心諗食唔切用來榨汁都抵。




為咗消滅士多啤梨，想到不如整士多啤梨蛋糕。我用嘅食譜係一個無油卷蛋糕嘅食譜，不過由於我諗住落多啲士多啤梨，所以我決定唔卷，做兩塊長形蛋糕。剛好我 兩年前買了一個兩格嘅長方形模（呢個模亦可以合埋，方便焗食物嘅時候，水份冇咁容易流失）一於用佢來整兩塊長方形蛋糕，切都唔使切，方便快捷。

蛋糕出爐放涼嘅時候，我又去咗對面買返D蛋同橙(車輋特別鍾意呢間鋪頭嘅大大個橙榨出嚟嘅橙汁），又比我見到士多啤梨！！


今次仲要係1kg 裝，1.90€! 仲平過上次2kg裝0.10€！我又點忍得手唔買呢！基本上差唔多見每一個人都有買士多啤梨！今次真係士多啤梨沒完沒了！

無油清蛋糕：
四隻蛋黃加80克糖混合，加入已打發起的四個蛋白中，再籂入100克麵粉(原食譜是使用80克麵粉加20克薯粉，不過我屋企冇晒薯粉，所以用咗100克麵粉），160度焗大約10-15分鐘。